«

»

Mar 05 2018

Print this Post

Way giplanong coal plant sukwahi sa taho; Bohol bukas sa labing makaayong teknolohiya

WAY giplano ang probinsiya nga coal plant o planta sa karbon para sa elektrisidad kay ang mga diskusyon bukas ngadto sa mga teknolohiya nga labing makaayo sa Bohol.

Kini giklaro sa Bohol Energy Development Advisory Group (BEDAG) samtang may pipilang nagpalakaw og estorya nga adunay plano sa pagtukod og coal power plant sa lalawigan.

Matud ni Gob. Edgar Chatto kinsa mao mismoy tsirman sa BEDAG, wa gyoy plano ang goberno alang sa usa ka pasilidad sa kuryente nga karbon o coal ang gamiton.

Kapin na sa 50 ka mga inbestor ang intresadong moapil sa pag-ugmad sa enerhiya ug duna pod hinuoy nitanyag og power facility ginamit ang coal.

Apan daghan sab ang nitanyag og nagkalain-laing teknonolohiya sa pagmugna’g elektrisidad pinaagi sa hydro, wind, solar, biomass, liquefied natural gas ug uban pa.

Gawasnong mopadayag si bisan kinsa o unsang grupo nga mosuporta o mosupak sa unsa mang teknolohiya nga gisugyot sa mga potensiyal nga power developer.

Kini makatabang sa pinal nga pag-aprubar sa Terms of Reference (TOR) alang sa competitive selection process o bidding nga gilatid sa Electric Power Industry Act of 2001 o EPIRA Law.

Nag-usa ang mga distribution utilities (DUs) nga BOHECO I ug II ug Bohol Light sa tumong nga silay mohimo sa bidding ug dili ang kagamhanang probinsiyal.

Kini ubos sa One Bohol Power (1BP) Agreement nga mousa ug motibuok sa ilang power supply demand, imbes mag-iyahay, ug mosiguro sa labing maayong terminong pabor sa mga Bol-anong konsumidor.

Gisagop sa BEDAG ang polisiya o baruganan nga maghangop ni bisan kinsang inbestor o developer para sa renewable energy sa Bohol.

Sukad pa kini sa mga unang paghisgot sa BEDAG sa pag-ugmad sa tinubdan ug suplay sa kuryente agi’g pangandam sa bul-og sa ekonomikanhong pag-uswag nga mositar og abunda, kasaligang elektrisidad.

Nunot sa maong polisiya, ang modaug nga bag-ong supplier og elektrisidad sa tulo ka mga DUs kinahanglang motamud sa tulo ka mga kriterya.

Kini mao ang pagka-cost efficient o arang-arang ug di mahal nga presyo, reliable supply o kasaligang suplay, ug pagka-environment friendly o mahigala-on sa kalikopan.

Sa ulahing tigom sa BEDAG, nipadayag ang mga DUs sa ilang mandato sa pagsagop sa prinsipyo sa labing maabot nga bili sa kuryente sumala sa EPIRA Law.

Niinsistir ang mga sakop sa BEDAG sa pag-apil gyod sa kalikopan ug pagkakasaligan sa suplay sa mga nag-unang konsiderasyon sa energy development program sa probinisya.

Subay kini sa pagtuman sa mga polisiya sa sustainable development o malungtarong kalamboan nga gilagda sa mga ordinansa.

Hukom sa BEDAG nga iapil ang publiko sa diskusyon pinaagi sa pagduso sa isyo ngadto sa Sangguniang Panlalawigan (SP).

Giduso na kini sa SP ngadto sa Committee of the Whole alang sa public consultation aron mabalanse ang panginahanglan sa cost-efficient, reliable supply ug environment-friendly nga power plant nga tukoron sa Bohol.

Permanent link to this article: http://edcom.bohol.gov.ph/way-giplanong-coal-plant-sukwahi-sa-taho-bohol-bukas-sa-labing-makaayong-teknolohiya/