«

»

Jan 31 2018

Print this Post

Wa nahumang proyektong tulay gipaaksyonan ni Chatto sa DPWH

Gawas sa nalata nga nasyonal nga karsada sa Cortes, laing proyekto sa DPWH ang gireklamo ug gipaaksyonan ni Gob. Edgar Chatto.

Kini sa dihang nasayran ni Chatto sa niaging tuig nga usa ka proyektong tulay sa Matin-ao, Sierra-Bullones ang giabandonar sa kontraktor.

Ang Cortes sakop sa DPWH-I ubos ni Engr. De Francis Antonio Flores samtang ang Sierra-Bullones sa DPWH-III kansang hepe mao si Engr. Aramis Torrefranca.

“We raised to DPWH Reg’l. Dir. Ador Canlas the problem even without anyone raising it first to our office,” matud ni Chatto sa iyang text message ning tagsulat.

Ang DPWH maoy implementing agency sa proyektong tulay, nga gitahong nagkantidad og subra sa P10 milyones.

Nidugang ang gobernador, “As long as we are informed, we do not need to wait for complaints in raising concerns to proper authorities concerned.”

Ang bridge project gisugdan sa 2016 apan wa nahuman hangtud karon bisa’g ang billboard sa proyekto nagbutyag nga kumpletohon ang proyekto sud lang sa 10 ka buwan.

Ang kahasol ngadto sa katawhan gipun-ag kadelikado sa dapit nga daling mobaha, matud ni Chatto sa iyang reklamo.

Giawhag sa gobernador ang kadagkuan sa DPWH nga susihon ang proyekto ug pahibaw-on siya sa aksyong gihimo.

Agi’g tubag sa iyang reklamo, gipahibawo ni Canlas si Chatto nga gi-terminate o giputol na ang kontrata kay dako na kaayo’g negative slippage ang kontraktor, nga giilang WERR Construction.

Ang negative slippage nagpasabot sa percentage sa kalangan sa trabahong wa buhata o wa nahuman.

Sumala sa taho sa rehiyonal nga hepe sa DPWH ngadto sa gobernador, ipa-blacklist ang maong kontraktor.

Gi-bid na og usab ang proyekto ug girekomendar ngadto sa kalihim sa DPWH ang change of creditor.

Kon aprubado na ang rekomendasyon, i-award ang kontrata ngadto sa bag-ong kontraktor, nga giilang A.C. Rivero Construction, matud ni Canlas kang Chatto.

Permanent link to this article: http://edcom.bohol.gov.ph/wa-nahumang-proyektong-tulay-gipaaksyonan-ni-chatto-sa-dpwh/