«

»

Feb 01 2018

Print this Post

Team gimugna ni Chatto aron moedukar sa mga Bol-anon kalabot sa pederalismo

GILAGDAAN ni Gob. Edgar Chatto sa atubangan sa mga kapitan sa tibuok lalawigan ganiha ang usa ka executive order nga nagmugna sa Federalism Caravan Team sa Bohol.

Kini atol sa ikaduhang adlaw sa Provincial Congress sa Association of Barangay Councils (ABC) o Liga ng mga Barangay (LnB), Bohol Chapter, nga gipahigayon sa Bohol Tropics, syudad sa Tagbilaran.

Tumong ni Chatto nga edukahon ang mga Bol-anon sa nasyonal nga lakang sa pag-usab sa sistema sa goberno sa Pilipinas ngadto sa pederalismo.

Angay lang nga isabwag ang hingpit nga kasayuran kay, matud ni First District Rep. Rene Relampagos, di detalyado ug sagad “motherhood statements” pa lang ang nadungog sa mga Pilipino.

Nagtoo si Chatto nga maalamonng mohukom ang katawhang nasayud.

Gihangop ang inisyatiba sa gobernador taliwa sa namatikdan sa mga Bol-anon nga dunay pipila ka grupong puro paukyab ang gihimo apan di kapasabot sa mga tawo kay pabelib ang naa sa utok.

Ang Federalism Caravan Team pangunahan ni Provincial Legal Officer ug Acting Provincial Administrator John Mitchel Boiser ug manlalaban Warren Yap, Jr., presidente sa Integrated Bar of the Philippines sa Bohol.

Uban kang Chatto nga namulong sa ABC Congress ganiha sila DILG Usec. Catalino Cuy, kinsa tsirman sa Dangerous Drugs Board, Third District Rep. Art Yap, Relampagos, ug Clarin Mayor Rey Allen Piezas kinsa presidente sa League of Municipalities of the Philippines – Bohol Chapter.

Gilangkuban sa mga kapitan sa 1,109 ka mga barangay sa Bohol, ang ABC gipangulohan ni Bokal Romulo Cepedoza, kinsa ex-officio member sa Sangguniang Panlalawigan.

Permanent link to this article: http://edcom.bohol.gov.ph/team-gimugna-ni-chatto-aron-moedukar-sa-mga-bol-anon-kalabot-sa-pederalismo/