«

»

May 23 2017

Print this Post

Puwede ni’s Bohol? Kuryente gikan sa sagbot nga kan-ono’g elepante

USA ka plano sa pagmugna’g elektrisidad gikan sa sagbot nga kan-ono’g elepante ang gipadayag sa usa ka Koreanong kompanya ngadto sa kagamhanang probinsiyal.

Inisyal nga gipresentar sa mga representante sa kompanya kang Gob. Edgar Chatto kaganiha ang teknolohiya sa planta sa kuryente nga sugnoran og elephant grass gikan sa Uganda, usa ka nasud sa Africa.

Ang lawas sa sagbot nga motubo lapas sa singko metros maoy isugnod sa planta’s elektrisidad samtang ang ubang parte sa tanom puwedeng ilawog sa mga hayop.

Ang Uganda elephant grass giingong paspas kaayong molabong ug puwede nang hagbason aron isugnod sa planta duha ka tuig sukad sa pagtanom.

Ang sagbot kausa ra itanom ug sigeho’g ani kada unom ka buwan sud sa 30 ka tuig.

Hinoon ang planta momugna lang og 7 megawatts nga kuryente samtang mas intresado ang probinsiya sa dagkong pasilidad alang sa abunda, kasaligan ug di mahal nga kuryente.

Ang grupong Koreano gikuyogan nila ni retired Judge Avelino Puracan ug Bise Gob. Dionisio Balite ngadto kang Chatto sa Governor’s Mansion.

Gitumbok ang lungsod sa Trinidad nga potensiyal nga lokasyon sa proyekto.

Ang plano pormal nga ipresentar ngadto sa Bohol Enegry Development Advisory Group (BEDAG) sama sa mga naunang nagkalain-laing power generation proposal. (EDCom Ven/Jasmine Reyes)

Permanent link to this article: http://edcom.bohol.gov.ph/puwede-nis-bohol-kuryente-gikan-sa-sagbot-nga-kan-onog-elepante/