«

»

Jan 26 2017

Print this Post

Planning officer sa Bohol huwaman sa Malacañang

titus

HUWAMAN sa Malacañang ang Provincial Development and Planning Officer (PPDO) sa Bohol kansang katakus ug kakugi gikinahanglan sa Urban Development Coordinating Council (HUDCC) sa nasud.

Ang hangyo sa Office of the President nga mogamit sa kaalam ug serbisyo ni PPDO chief ug Atty. John Titus Vistal pormal nga gipadangat ni Cabinet Sec. Leoncio Evasco, Jr. ngadto kang Gob. Edgar Chatto.

Nisugot si Chatto kay kini laing pagmatuod sa suporta ug bulig sa kagamhanan sa Bohol ngadto sa nasud ug administrasyon ni Pres. Rodrigo Duterte.

Nagpasalamat si Evasco kang Chatto sa iyang suwat-hangyo ngadto sa gobernador.

Buot sa Malacañang nga paserbisyohon sa nasud ang hepe sa PPDO ug usa sa mga labing sinaligan ni Chatto sa kapitolyo isip secretary general sa HUDCC.

Kini gikonsiderar nga usa ka pag-ila sa nasudnong liderato ni Duterte sa kapasidad sa administrasyon sa lalawigan sa Bohol.

Si Vistal moalagad sa HUDCC nunot sa gitawag og secondment, usa ka klase sa pag-irog sa kawani sa goberno gikan sa usa ka ahensiya ngadto sa mas taas nga ahensiya nga di na magkinahanglan og appointment.

Ang secondment mode of personnel movement gitugot sa Civil Service Commission (CSC), matud ni Chatto ngadto sa Sangguniang Panlalawigan (SP) pinangunahan ni Bise Gob. Dionisio balite.

Nisuwat ug giawhag ni Chatto ang SP sa paghatag kaniya’g authority sa pagpirma sa Memorandum of Agreement tali sa kagamhanang probinsiyal ug buhatan sa presidente sa pagpahuwam kang Vistal.

Tumong niini, ang SP gitakdang mopasar og resolution sa sesyon ugma, Biyernes, Enero 27.

Bisa’g huwaman siya sa Malacañang, si Vistal moalagad gihapon sa Bohol.

Kini pinaagi sa iyang “strategic position” sa kaulohan kay mahimo siyang tulay sa ubang ahensiya nga dako’g matabang sa kaugmaran sa lalawigan, matud sa gobernador.

Posibleng moalagad si Vistal sa HUDCC sud sa usa ka tuig ug mobalik sa PPDO, nga iyang gidumala sa taas nang katuigan bisan sa iyang kabatan-on.

Samtang wa si Vistal, ang PPDO dumalahon sa iyang takus usab nga luyo-luyo, si Peter Retutal.

GIREKOMENDAR SA NAKASUWAY SA IYANG ABILIDAD

Ang mahinungdanong serbisyo ni Vistal sa HUDCC girekomendar ni Usec. Gloria Jumamil-Mercado, kinsa nasinati na sa abilidad ug kabuotan sa nahauna.

Namatud-an ang katakus ug kakugi ni Vistal sa nagkauban sila sa trabaho para sa kaugmaran sa Bohol samtang si Mercado mao pay dean sa Graduate School sa Development Academy of the Philippines (DAP).

Nakigtagbo mismo si Mercado kang Chatto ug Vistal sa niaging Disyembre.

Gawas nga abogado ug certified public accountant, si Vistal usa ka national urban planning board topnotcher ug lisensiyadong environmental planner.

Matud ni Chatto, dakong garbo sa mga Bol-anon ang serbisyo ni Vistal sa HUDCC kay kini dugang nga kontribusyon sa Bohol sa nasudnong paglambo.

Permanent link to this article: http://edcom.bohol.gov.ph/planning-officer-sa-bohol-huwaman-sa-malacanang/