«

»

Jun 20 2017

Print this Post

P602 milyones nga lapad, konkretong kadalanan aron hapsay ang pagsud-gawas sa Panglao airport

KAPIN sa P602 milyones nga pagpalapad og pagkonkreto sa kadalanang direktang pasulod ug pagawas sa Panglao airport ang ipatuman sa sunod tuig, sumala ni Gob. Edgar Chatto.

Kini maglakip sa pagpalapad ngadto sa upat ka linya ug pagsemento sa barangay Tawala road, ingon man ang drainage niini, sa kantidad nga P237.33 milyones.

Konkretohon usab ang dalan sa Biking sa Dauis gikan sa junction sa Panglao island circumferential road ngadto sa Libaong ug Bolod padulong sa tugpahanan, P231.25 milyones.

Sementohon pod ang Lourdes-Bolod-Tawala road nga molusot gihapon ngadto sa bag-ong tugpahanan sa pondong P134.35 milyones.

Matud sa gobernador, kining tanan naapil na sa PAPs kon Programs, Activities and Projects sa DPWH alang sa 2018.

Ang maong mga agianan mokumplemento sa four lanes usab nga main airport access road, nga duna poy central lights, nga nagsumpay ngadto sa Dauis-Panglao central highway.

Ang main access road project gastohan sa JICA isip kabahin mismo sa new Bohol airport complex project.

Dugang niini ang pagmugna og lapad nga rotunda sa intersection alang sa mas hapsay nga bul-og sa trapiko, sumala sa gobernador.

Sa airport project coordination meeting pinangulohan ni Chatto di pa dugay, giawhag si Panglao Mayor Nila Montero ug ang mga natungdang opisyales sa barangay nga masiguro nang daan ang road right of way.

Permanent link to this article: http://edcom.bohol.gov.ph/p602-milyones-nga-lapad-konkretong-kadalanan-aron-hapsay-ang-pagsud-gawas-sa-panglao-airport/