«

»

Jan 05 2017

Print this Post

Mobarug na gyod ang bag-ong tambalanan sa Loon

15895360_565247953668401_5917214342458939119_nMOBARUG na gyod ang bag-ong district hospital sa Loon human sa groundbreaking sa proyekto pinangunahan nila ni Department of Health Sec. Paulyn Jean Rossel-Ubial, Gob. Edgar Chatto ug Kong. Rene Relampagos.

Ang seremonya gihimo niadtong kagahapon kanus-a usab gipahigayon ang groundbreaking sa pag-ugmad sa kasamtangang Gov. Celestino Gallares Memorial Hospital sa syudad sa Tagbilaran.

Tukoron ang tambalanan sa Loon sa bag-ong lokasyon niini sa barangay Canhangdon sa kantidad nga P80 milyones puli sa orihinal nga district hospital nga giguba sa kusog nga linog.

Nalangan ang proyekto tungod sa pagdumili kaniadto sa Mines and Geosciences Bureau sa DENR sa paghatag og clearance kay pulos dili luwas ang mga naunang dapit nga giplanohang barugan niini.

Ang groundbreaking gitambongan usab nila ni Provincial Administrator Alfonso damalerio II, Mayor Elvi Relampagos, Bokal Ricky Masamayor, Dr. Cesar Tomas Lopez kinsa health services consultant sa probinsiya, ug mga opisyal sa tambalanan.

Sa laing bahin, ang pag-upgrade sa Gallares hospital mokantidad og P555 milyones nga itukod og lima ka andana nga istruktura sa dapit diin nahimutang ang kasamtangang tambalanan.

Lahi kini sa proyekto sa pagpabarug og bag-o mismong Gallares hospital sa bag-ong lokasyon sa Cortes, lungsod nga silingan sa syudad sa Tagbilaran.

Matud sa kalihim sa DOH, ihinayon gyod ang pagtukod sa bag-o, moderno ug mas dako nga Gallares hospital sa Cortes.

Ang Gallares hospital modernization mokabat tanan og P2.2 bilyones, apil ang upgrading sa kasamtangang pasilidad niini ug pagtukod sa pasilidad sa Cortes.

Ang Cortes project site gibisita ni Chatto ug NEDA Director General Ernesto Pernia sa niaging semana.

Kini gibisita usab ni Ubial uban sa gobernador kagahapon atol sa groundbreaking sa Gallares hospital upgrading ug Loon hospital project.

Ang pagmoderno Gallares hospital gilihuk sa DOH ug probinsiya human sa linog sa 2013 hangtud nga nasiguro kaniadto ang inisyal nga P555 milyones.

Ang tibuok programa sa modernisasyon nga gastohag P2.2 bilyones aprubado na usab sa NEDA Board ubos sa administrasyon Duterte, sumala sa gobernador. (Ven rebo Arigo)

Permanent link to this article: http://edcom.bohol.gov.ph/mobarug-na-gyod-ang-bag-ong-tambalanan-sa-loon/