«

»

Aug 21 2017

Print this Post

Mga bakwit sa Marawi nagpasalamat ni Chatto sa kaayo sa Bohol kanila

NAGPASALAMAT ang mga bakwit sa Marawi City kang Gob. Edgar Chatto sa pagdawat kanila sa Bohol samtang nagkadugo ug nagun-ob ang ilang dakbayan sa Mindanao.

 

Ang Bohol gihulagway sa mga Maranao nga Muslim nga kasamtangang gipahiluna sa Dauis nga usa gyod tinuod ka “golden state of friendship” kay saksi sila niini.

 

Daghan nang dapit sa nasud ang ilang naabtan, apan ang Bohol maoy modelong dapit nga malinawon ug husay, matud ni Mascara Macaayong ug iyang pamilya sa ilang suwat-pasalamat sa gobernador.

 

Ila pong gipadangat kang Chatto ang kalipay ug kahinangop sa pag-atiman kanila sa DSWD sa Bohol.

 

Sila nanghinaut nga makabisita kanila si Chatto kon mabalik sila sa Marawi ug Lanao del Sur kay buot nilang gantihan ang Bol-anong kaayo ngadto kanilang biktima sa grabeng terorismo ug kagubot. (Ven rebo Arigo)

Permanent link to this article: http://edcom.bohol.gov.ph/mga-bakwit-sa-marawi-nagpasalamat-ni-chatto-sa-kaayo-sa-bohol-kanila/