«

»

Jul 06 2017

Print this Post

Labing dakong Bol-anong tigom sa USA ug Canada ubanan ni Gob. Chatto, BM Arcamo

conbusac

UBANAN ni Gob. Edgar Chatto ang labing dakong tigom sa mga Bol-anon sa Amerika ug Canada nga himoon sa Toronto, Canada sugod sa Bernes hangtud sa Domingo o Hulyo 7-9.

Gikan sa kaulohan, ang gobernador molupad karong hapon uban kang Bokal Benjie Arcamo alang sa ika-17 nga Biennial Convention sa Confederation of Boholanos in the United States and Canada (CONBUSAC).

Ang matag duha ka tuig nga konbensyon pangunahan sa presidente sa CONBUSAC nga si Rhine ug iyang kapikas nga si Cielo.

Si Chatto gipaabot nga mopadayag sa labing ulahing katikaran sa mga nag-unang programa ug proyekto sa lalawigan, apil ang mga programa sa probinsiya nga gisuportahan mismo sa CONBUSAC.

Si Chatto ug Arcamo ubanan sa ilang mga kapikas nga sila si Bohol First Lady ug Balilihan Mayor Pureza Veloso-Chatto ug Regional Trial Court Judge Lindecita Arcamo.

Sukad siya nagobernador sa 2010, kanunayng gipakita ni Chatto ang iyang suporta sa mga langyawng Bol-anon nga naglig-on sa ilang katali-an alang usab sa kaayohan sa inahang probinsiya.

Kini dugang nga pagmatuod sa iyang pasalamat ngadto sa CONBUSAC sa ngan sa mga Bol-anon dinhi sa Bohol.

Apil nga gisuportahan sa CONBUSAC ang pagpasanay sa mga hayop alang sa panginabuhi pinaagi sa “Let’s Help Bohol Program,” scholarship, ug Children’s Playground sa CPG Park sa syudad sa Tagbilaran.

Permanent link to this article: http://edcom.bohol.gov.ph/labing-dakong-bol-anong-tigom-sa-usa-ug-canada-ubanan-ni-gob-chatto-bm-arcamo/