«

»

Jan 19 2017

Print this Post

Duterte, mga gobernador magtagbo karong hapon

MAGTAGBO sa Malacañang karong hapon si Pres. Rodrigo Duterte ug mga gobernador, kansang national league secretary-general mao si Bohol Gov. Edgar Chatto, aron hisgotan ang kalinaw ug kaugmaran.

Sa di pa ang konperensiya, manumpa sa presidente ang mga tsirman sa mga Regional Peace and Order Council (RPOC), sumala sa nasudnong presidente sa liga nga si Albay Gov. Al Francis Bichara.

Gipaabot ni Chatto ug kaubanang gobernador nga subling manawagan si Duterte sa lokal nga suporta sa gubat batok sa druga.

Way hunong sa Bohol ang kusgan ug seryosong kampanya kontra sa druga samtang tukoron sa probinsiya ang usa sa upat ka mga major national rehabilitation center sa nasud.

Gipatawag sa presidente ang mga mayor sa tibuok nasud sa niaging semana ug nihangyo sab kanila nga tinud-anayng motabang sa pagsumpo sa druga.

Napakyas ang saad ni Duterte sa eleksyon nga papason ang druga sud sa unom ka buwan bisag kapid-an na ka libo ang gipangpatay, sagad kanila mga ordinaryong Pilipino.

Ginganlan mismo ni Duterte ang mga heneral sa kapolisan ug ubang gamhanang opisyal sa goberno, ingon man dagkong negosyante, nga matud niya nalambigit sa kalihukan sa druga sa nasud.

Apan way bisag usa kanila nga gidakop na lamang unta, sumala sa mga tigpaniid.

Padayong niinsistir ang administrasyong Duterte nga nagmadaugon kini sa gubat sa druga bisag gitaho nga hayan modangop na lang sa pagdeklarar og martial law.

Kini atubangan sab sa way katapusang dugoong kasamok sa Mindanao nga nagpadayo’g hagit sa lideratong Duterte sa nasud.

Permanent link to this article: http://edcom.bohol.gov.ph/duterte-mga-gobernador-magtagbo-karong-hapon/