«

»

Jul 25 2016

Print this Post

Chatto napiling kalihim-heneral sa tanang gobernador sa nasud

13819523_10208536849356593_1538553731_nNAPILING kalihim heneral sa tanang gobernador sa nasud si Gob. Edgar Chatto atol sa asembleya ug eleksyon sa League of Provinces of the Philippines (LPP) sa Heritage Hotel sa Manila.

Human sa asembleya, si Chatto ug kaubanang gobernador mosaksi sa unang State of the nation Address (SONA) ni Pres. Rodrigo Duterte sa Kongreso karong hapon.

Napiling bag-ong presidente sa governors’ league si Ilocos Sur. Gov. Ryan Luis Singson ug chairman of the board si Albay Gov. Al Francis Bicharra.

Sa wa pa ang eleksyon, ang gobernador sa Bohol maoy co-presiding officer sa pagbukas sa LPP assembly uban sa gipulihang presidente nga si Oriental Mindoro Gov. Alfonso Umali.

Si Chatto mao sab mismoy gipili nga mo-preside sa eleksyon sa pagkapresidente ug pagka-board chairman sa liga sa mga gobernador.

Respetadong sakop sa liga si Chatto kay siya mismo kaniadto ang giilang utok ug tingog sa mga gobernador sa pagmugna sa KALSADA Program nga gisugdan sa pagpatuman sa nasud ning tuiga.

Ang asembleya ug pagpanumpa sa mga opisyal sa liga gisaksihan sa mga sakop sa Duterte cabinet.

Lakip kanila sila si Budget Sec. Ben Diokno, Health Sec. Paulyn Ubial, Environment Sec. Gina Lopez, Defense Sec. Delfin Lorenzana, Agrarian Reform Sec. Rafael Mariano ug Information Communications Technology Sec. Rodolfo Salalima.

Kadto maoy unang asembleya ug eleksyon sa mga gobernador sa nasud ubos sa administrasyon ni Pres. Rodrigo Duterte.

Para sa uban, ang pagkapili ni Chatto nga nasudnong secretary-general sa LPP nagsilbe sab nga gasa sa iyang silver wedding anniversary uban kang Balilihan Mayor Pureza Veloso-Chatto.

Gisaulog sa usa ka hotel resort sa Panglao niadtong Sabado ang ika-25 nga sumad sa kaminyoon ni Chatto, kinsa ika-25 nga gobernador sa Bohol.

Sa niaging semana, napili si Tagbilaran City Mayor John Geesnell Yap II nga Region 7 representative sa League of Cities of the Philippines (LCP).

Si Tagbilaran City Vice Mayor Jose Antonio Veloso, bayaw ni Chatto, maoy interim national president sa Vice Mayors’ League of the Philippines (VMLP).

Posibleng ang anak ni Duterte nga si Davao City Vice Mayor Paolo Duterte ang mosunod nga pangulo sa VMLP.

Permanent link to this article: http://edcom.bohol.gov.ph/chatto-napiling-kalihim-heneral-sa-tanang-gobernador-sa-nasud/