«

»

Jan 25 2018

Print this Post

Central Visayas kinatas-ag pagsaka sa ani sa humay sa tanang rehiyon sa nasud

NISAKA og 45% ang produksyon sa humay sa Central Visayas, kinatas-an sa tanang rehiyon sa nasud, sumala ni Department of Agriculture Reg’l. Exec. Dir. Leo Cañeda basi sa taho sa Philippine Statistics Authority.

Hinuon, kinadaghanan gihapo’g humay ang Central Luzon nga niani og 3.2 milyones metriko toneladas sa niaging tuig.

Apan kini nirehistro lang og 8.4% nga usbaw kon itandi sa 3.3 million metric tons nga produksyon sa humay sa samang rehiyon sa 2016.

Ang Central Visayas niani og 335,420 metric tons sa 2017 gikan sa 231,982 metric tons sa 2016, ug kini nagpasabot sa 44.6% nga sulbong sa produksyon.

Sa niaging tuig gihapon, nilapad ang kaumahan sa humay sa Rehiyon 7—nga gilangkuban sa Bohol, Sugbo, Siquijor ug Negros oriental—ngadto sa 100,834 ektaryas gikan sa 80,153 ektaryas sa 2016.

Kini nagkahulogan nga bisan sa kausaban sa klima, abundang nibunga ang hiniusang paningkamot sa mga kaalayon sa kagamhanan ug mag-uuma mismo, matud ni Cañeda sa iyang pormal nga taho kang Gob. Edgar Chatto.

Giila sa ahensiya sa agrikultura ang 54.2% nga tampo sa Bohol sa kinatibuk-ang produksyon sa humay sa Tunga-tungang Kabisay-an.

Permanent link to this article: http://edcom.bohol.gov.ph/central-visayas-kinatas-ag-pagsaka-sa-ani-sa-humay-sa-tanang-rehiyon-sa-nasud/