«

»

Aug 04 2016

Print this Post

4 ka Korea-Bohol flights kada semana posibleng sugdan sa Pasko

POSIBLENG upat gyod ka mga panaw sa PAL matag semana ang mobukas sa Korea-Bohol direct flight nga gikahinamang sugdan sa Disyembre.

Kini masaaron di lang sa lokal nga turismo apan sa ekonomiya kay mosud dinhi ang mas daghang turista ug potensiyal nga mga inbestor, matud ni Gob. Edgar Chatto.

Target sa PAL nga sugdan sa Pasko ang panaw gikan sa Busan ug Incheon sa South Korea human maandam ang pre-departure area sa ikaduhang andana sa terminal building sa Tagbilaran airport.

Apil niini ang bag-ong rampa nga magamit lang sa mga pasahero sa international flight nunot sa nasabotan sa tigum ni Chatto ug opisyales sa PAL, civil aviation ug imigrasyon sa kaulohan sa niaging semana.

Ang Busan ug Incheon maoy ikaduha ug ikatulong dagkong syudad sa Korea diin nagkumplemento ang paspas nga kauswagan tungod sa teknolohiya ug daghang atraksyon nga nakahimsog sa turismo.

Permanent link to this article: http://edcom.bohol.gov.ph/4-ka-korea-bohol-flights-kada-semana-posibleng-sugdan-sa-pasko/